Latest Update on Rasuwa Flood: Search, Rescue and Relief Operations Intensify
रसुवा बाढीसम्बन्धी खोज, उद्धार तथा राहतको पछिल्लो अपडेट सार्वजनिक
काठमाडौं — राष्ट्रिय विपद् जोखिम न्यूनीकरण तथा व्यवस्थापन प्राधिकरणले रसुवा बाढीसम्बन्धी खोज, उद्धार तथा राहतको पछिल्लो विवरण सार्वजनिक गरेको छ। प्राधिकरणका अनुसार २०८३ भदौ १५ गते साँझ ६ बजेसम्म मानवीय क्षति ७३९ पुगेको छ भने ठूलो संख्यामा मानिस अझै सम्पर्कविहीन रहेको जनाएको छ।
प्राधिकरणले सार्वजनिक गरेको विवरणअनुसार विभिन्न जिल्लामा शव फेला परेका छन्। रसुवामा २३, नुवाकोटमा १५, धादिङमा ५५, गोरखामा ६५, नवलपरासी पूर्वमा २१६, नवलपरासी पश्चिममा १६८, तनहुँमा ३८ र चितवनमा १७९ शव फेला परेको विवरण छ।
बाढी तथा विपद्का घटनामा २७९ जना घाइते भएको र विभिन्न अस्पतालबाट १६८ जना डिस्चार्ज भइसकेको प्राधिकरणले जनाएको छ। नेपाली सेनामार्फत २,७०० जनाले स्वास्थ्य उपचार पाएका छन्।
करिब ३ हजारभन्दा बढी सम्पर्कविहीन
प्राधिकरणका अनुसार करिब ३,१२५ जना सम्पर्कविहीन छन्। नुवाकोटमा मात्रै करिब १,४५५ जना, जलविद्युत् आयोजनाबाट करिब ६३२ जना तथा अन्य क्षेत्रमा समेत मानिस सम्पर्कविहीन रहेको विवरणमा उल्लेख छ। सम्पर्कविहीनमध्ये ५२ जना विदेशी नागरिक, विदेशबाट घुम्न आएका नेपाली १४६ जना, लाङटाङ राष्ट्रिय निकुञ्जका ३ जना तथा क्वारेन्टाइन कार्यालयका ३ जना रहेको जनाइएको छ।
११ हजारभन्दा बढीको उद्धार
हालसम्म ११,३७९ जनाको उद्धार गरिएको छ। नेपाली सेनाको हेलिकप्टरमार्फत विदेशी २५३ जना र नेपाली ३,४०४ जनाको उद्धार गरिएको प्राधिकरणले जनाएको छ। नेपाली सेनाले हालसम्म ४९९ पटक हवाई उद्धार उडान गरेको छ भने निजी क्षेत्रका विमानमार्फत काठमाडौंबाट २९ वटा उडान भएका छन्।
उद्धार तथा राहत कार्यमा नेपाल प्रहरी, नेपाली सेना र सशस्त्र प्रहरी गरी २१ हजारभन्दा बढी सुरक्षाकर्मी परिचालन गरिएको छ।
प्रभावित क्षेत्रमा नगद राहत
नेपाल सरकारले रसुवा र नुवाकोटलाई १–१ करोड रुपैयाँ, धादिङलाई ५० लाख रुपैयाँ तथा प्रभावित १५ पालिकालाई ६ करोड ७५ लाख रुपैयाँ नगद राहत उपलब्ध गराएको छ।
त्यस्तै, प्रभावित क्षेत्रमा ३७ ट्रक र ३७ बोलेरोमार्फत खाद्य तथा गैरखाद्य राहत सामग्री पठाइएको छ। हेलिकप्टरबाट समेत ८ पटक उडान गरी राहत सामग्री पुर्याइएको प्राधिकरणले जनाएको छ।
इन्धन र सञ्चार सेवा पनि प्रभावित
प्रभावित क्षेत्रमा हाल ४५ हजार लिटर डिजेल, २० हजार लिटर पेट्रोल र ९ हजार लिटर हवाई इन्धन मौज्दात रहेको विवरणमा उल्लेख छ।
बाढीका कारण नेपाल टेलिकमका ११० वटा टावरमा क्षति पुगे पनि हाल सबै सञ्चालनमा ल्याइएको छ। एनसेटका ७८ टावरमा क्षति पुगेकोमा ७५ वटा टावर पुनः सञ्चालनमा आइसकेका छन्।
प्राधिकरणले पहिचान खुल्न नसकेका शवहरू विभिन्न जिल्लाका २१ अस्पतालमा राखिएको जनाएको छ। विस्तृत विवरणका लागि प्राधिकरणको आधिकारिक सामाजिक सञ्जाल तथा नेपाल प्रहरीको Disaster Reporting प्रणालीमा जानकारी लिन सकिने जनाएको छ।